WhatsApp hesablarının ələ keçirilməsi halları artır: İstifadəçilərə xəbərdarlıq edildi

WhatsApp və WhatsApp Business hesablarının kiberdələduzlar tərəfindən ələ keçirilməsi riskinin artması ilə əlaqədar Milli Kibertəhlükəsizlik Agentliyi (MKA) vətəndaşlara müraciət edib. İstifadəçilərə şəxsi hesablarını qorumaq və mümkün təhlükələrin qarşısını almaq üçün bir sıra təhlükəsizlik qaydalarına əməl etmək tövsiyə olunur.

Dini.Az xəbər verir ki, hesabların təhlükəsizliyini təmin etmək üçün istifadəçilər bir neçə vacib addım atmalıdırlar.

WhatsApp hesabını qorumaq üçün nə etmək lazımdır?

1. Bağlı cihazları yoxlayın

WhatsApp tətbiqinin «Bağlı cihazlar» bölməsinə daxil olun. Siyahıda tanımadığınız cihaz varsa, həmin cihazdan dərhal çıxış edin. Nəzərə alın ki, hesabınız öz telefonunuzda normal işləsə belə, başqa bir şəxs ona əlavə cihaz vasitəsilə daxil ola bilər.

2. İkimərhələli təsdiqləməni aktivləşdirin

Hesabınızın qorunmasını gücləndirmək üçün parametrlərdən ikimərhələli təsdiqləməni aktivləşdirin. Mümkün olduqda, hesabın bərpası üçün təhlükəsiz elektron poçt ünvanı da əlavə edin.

3. Təsdiq kodlarını heç kimə verməyin

SMS vasitəsilə gələn təsdiq kodunu, təhlükəsizlik PIN-kodunu və cihaz bağlantısı üçün istifadə olunan kodları başqa şəxslərlə paylaşmayın. Özünüzün başlatmadığınız giriş və cihaz bağlantısı sorğularını təsdiqləməyin.

4. Saxta keçidlərə və QR-kodlara aldanmayın

«Hesabınız bağlanacaq», «Biznes hesabınızı təsdiqləyin» və ya «Dəstək xidməti» adı altında göndərilən şübhəli mesajlara ehtiyatla yanaşın. Naməlum keçidlərə daxil olmayın və mənşəyinə əmin olmadığınız QR-kodları skan etməyin.

5. Tətbiqi və telefonu yeniləyin

WhatsApp və WhatsApp Business tətbiqlərini yalnız rəsmi tətbiq mağazalarından yükləyin və yeniləmələri vaxtında quraşdırın. Telefonunuzun təhlükəsizlik yeniləmələrini də diqqətdən kənarda saxlamayın. Yeni cihaz bağlantıları barədə bildirişlərə nəzarət edin.

6. WhatsApp Business hesabına nəzarət edin

Biznes hesabından istifadə edən şəxslər bağlı cihazları mütəmadi yoxlamalı, hesaba yalnız səlahiyyətli əməkdaşların girişinə icazə verməlidirlər. İşdən ayrılan əməkdaşların hesabla əlaqəli giriş imkanları vaxtında ləğv edilməlidir.

Hesabınızın ələ keçirildiyindən şübhələnirsinizsə, nə etməlisiniz?

Hesabınızda şübhəli fəaliyyət aşkar etdikdə, ilk növbədə bağlı cihazları yoxlayın və tanımadığınız cihazlardan çıxış edin.

Hesaba girişinizi itirmisinizsə, nömrənizi WhatsApp-ın rəsmi tətbiqində yenidən qeydiyyatdan keçirməyə çalışın və tətbiqin təqdim etdiyi təhlükəsizlik təlimatlarına əməl edin. Zərurət yarandıqda, rəsmi dəstək xidmətinə müraciət edin.

Bundan əlavə, yaxınlarınızı və əlaqədə olduğunuz şəxsləri xəbərdar edin. Belə ki, hesabınızdan istifadə edən dələduzlar adınızdan pul istəyə, təsdiq kodları tələb edə və ya zərərli keçidlər göndərə bilərlər.

Vacib təhlükəsizlik qeydi

İkimərhələli təsdiqləmənin aktivləşdirilməsi hesabın qorunması üçün mühüm addımdır. Lakin bu funksiya hesabınıza əvvəlcədən qoşulmuş naməlum cihazları avtomatik olaraq ayırmır. Buna görə də təhlükəsizliyi təmin etmək üçün həm ikimərhələli təsdiqləməni aktivləşdirmək, həm də bağlı cihazları ayrıca yoxlamaq vacibdir.

WhatsApp hesabınızın təhlükəsizliyini qorumaq üçün təsdiq kodlarınızı gizli saxlayın, şübhəli mesajlara inanmayın və hesabınıza qoşulmuş cihazları mütəmadi yoxlayın.