Sürix parlamenti məktəblərdə hicabı qadağan etdi

İsveçrə Xalq Partiyası tərəfindən məktəblərdə hicabın qadağan edilməsinə dair irəli sürülən təşəbbüs Sürix parlamenti tərəfindən təsdiqlənib.

dini.az xəbər verir ki, Sürix kanton parlamentində keçirilən səsvermədə müəllimlər və şagirdlər üçün məktəblərdə və uşaq bağçalarında hicabın qadağan edilməsinin lehinə 87, əleyhinə isə 82 səs verilib.

Bu tədbir əsasən hicaba və digər İslam örtüklərinə qarşı yönəlib. Bu səsvermədən sonra Sürix Hökumət Şurası iki il ərzində bununla bağlı qanun layihəsi hazırlamalıdır.

Parlament İsveçrə Xalq Partiyasının (SVP) təklifini dəstəkləyib. Partiya iddia edir ki, örtük “məcburi təhsilin demokratik dəyərlərinə ziddir” və “ayrı-seçkilik yaradır, hüquq və imkanların bərabərliyinə mane olur”.

Digər deputat Domenik Ledergerber iddia edib: “Bu, dini simvol deyil, əksinə, siyasi İslamı təmsil edir”.

Məktəbli qızlar üçün baş örtüyünün tamamilə qadağan edilməsi konstitusion mübahisələrə səbəb ola bilər.

Aargau kimi digər kantonlar da, ən azı 16 yaşdan aşağı şəxslər üçün Sürixin nümunəsini tətbiq etməyi planlaşdırır. Sent-Qallen artıq müəllimlər üçün örtüyü qadağan edib, Bern və Şvis kantonlarında da oxşar qaydalar mövcuddur. Cenevrədə isə bütün dövlət qulluqçuları üçün üzü örtən geyimlərin istifadəsinə qadağa qoyulub.